 |
| 爬梯無難度 |
 |
| 三樓的高度 |
然後，我們去了嘉例山房飲ぶくぶく茶，即係泡泡茶。由於d泡堆得太高，飲個陣好狼狽，不停傻笑，隔離台既兩個婆婆就話我kawai，仲話我係香港びじん(bijin)，然後同行既人就笑我係Hong Kong bitch。後黎婆婆寫漢字比我地睇，先知佢話我係香港美人(びじん)。呵呵呵!跟住我地讚返佢地係日本美人，佢地就話自己係日本歐巴桑，係麻婆豆腐，好得意!
去龍潭就遇到一對爺孫，爺爺好慈祥，又好熱情同我地講咗一輪日文，先發現我地唔明，跟住轉用英文。佢原來係大學畢業生，去過香港玩。今日帶個孫黎餵魚魚同鵝鵝。佢個孫好可愛，但望到我地就怕醜，一直dup低頭，哈！點解日本d小朋友特別可愛?
第三日，本來今日上午打算去北谷附近逛逛，再去美國村。結果全世界訓到9點幾，出門時又落大雨，去到巴士站已經11點。由於我地個樣太迷惘，比觀光公司既一個婆婆留意到，仲走過黎幫我地。雖然佢d英文有d我都聽唔明，但都已經好過其他日本人。佢教我地搭車，仲教路話識玩一定玩local bus tour，帶咗我地去book，真係幾抵玩，最重要係唔駛自己plan transit，好期待!
但係美國村真係幾悶，可能American style唔岩我地?我最開心都係食吉列蝦飯同坐摩天輪。唉不過落雨真係好掃興，結果我地連sunset beach都唔想去，費事去到有股跳海自殺既氛圍走出黎，哈!
跟住我地搭的士去咗沖繩市，結果一如婆婆所料，幾乎全部鋪都關咗門。係香港，邊有鋪頭唔係禮拜日實要開門搶客架?sorry呢個邏輯係沖繩行唔通，因為根本無客，成條街人影都無隻。
但我地見到有間印度鋪開咗，馬上入去行下。見到老闆係印度面孔，就好好奇問佢識唔識講日文，佢話識，仲有個日本老婆，住在日本已經40年，哈哈!可能我地係佢第一個客，所以佢特別高興，佢仲show埋仔女既相比我睇。佢地都係出曬身，有個係機場航空公司做野，有個教書，有個在東京工作(聽唔明做咩工)。個老闆好熱情，仲介紹話過幾條街有好多印度鋪頭。不過我地行多陣就因為急尿而展開尋找廁所既旅程，行到更荒蕪，了無人煙但好多車既地方。呢個城市既人都去咗邊?
第四日，跟團去玩，導遊姐姐好似蠟筆小新既老師，著粉紅色套裝，超級溫柔。仲要係車上彈三線同唱歌比我地聽，哄我地訓教。即刻ff佢以前係個音樂家，退隱之後去咗做導遊......
講返行程，首先我地去咗琉球村睇傳統歌舞表演，比人捉咗出去跳舞。又比咗1000yen影遊客相，著琉球和服扮ga妹，好求其，原來就咁笠上去，跟住叫你用手hold住，就影啦。不過都影得好開心!
食飯就去咗御菓子殿食傳說中既沖繩料理，有一個便當，有d菜同煮物，仲有一舊好似東坡肉既野，好肥，但我都好努力咁食曬，幾好味，但我真係麻麻地肥肉，所以夜晚個餐已經唔想再食肉。食完飯去咗水族館，好興奮，而且終於見到多d人，有景點既感覺。之前個d旅遊景點完全好似up dup商場，好搞笑!
水族館真係好大，好多得意既魚魚。好想係度坐一日睇魚，但只有兩個鐘，好可惜!之後去菠蘿園，以為係戶外參觀，點知一去到就係商店，同埋不停咁排隊試食，然後發現所有產品都係一樣味道，同埋菠蘿都係新鮮食最好味，好想拿一個菠蘿返hostel。
夜晚返咗國際通食晚飯，之後見到有個後生仔係度自彈自唱。本來仲打算好寒酸咁比100yen佢，點知佢唔單止唔收錢，同我傾多幾句，我讚佢好勁，19歲就自己係街表演，佢就比咗手寫既單張同CD送比我，嚇親。佢話佢係大學生，平時會將自己寫既歌擺上網，真係好勁，又好可愛，同佢合照時仲側頭yeah，搞到我都變咗花痴。
第五日，搭船去咗阿嘉島，同行既人好似傻咗咁上甲板係咁大叫，又比風吹到癲咗，好好玩。成個人好似比太平洋包圍住咁，好正!落船個時仲去咗個青藍色既海。終於見到我想像中既沖繩，好似postcard咁靚。
食完飯借單車踩去座間味島，一上斜真係辛苦到大叫，回程時仲要落大雨，加上朋友跌親，整損咗腳，大家只好一邊擔遮，一邊推車返阿嘉島。個風力大到10號波咁，我把遮差d飛落海，最後大家無驚無險回到阿嘉島還車搭船。結果，大大個太陽就好過份地曬在船的玻璃上，我地就濕透咁坐係船入面，內心os一大串粗口。
第六日，下午去潛水，所以打算上午去到讀谷附近閒逛下，聽講有個小教堂好靚，點知去到問親個個都話唔知。去到一間貌似resort既地方，就走入去問路。好在老闆識英文。佢話我地行過去個教堂太遠，竟然叫員工載我地去。但好可惜去到教堂有人結緊婚，所以只可以係車上遠望。跟住我地去返間resort，以為準備要比老闆"劏"，要比好貴車費，點知佢完全唔要我地比錢，仲幫我地call的士去浮潛，明明佢間野都有浮潛玩，佢都算係送人去對家，竟然咁都肯制，真係太好人!我地唯有買d野食報答人地。
食完野，我地貪得意叫個職員教我地唱日文生日歌比莊員，但我地唔識講音樂，唯有亂講話三線個d，扮彈奏咁既樣。點知佢真係拿咗個三線出黎，仲幫我地彈生日歌。跟住我地仲一齊試彈三線，好有趣!
下午去潛水，本來都幾緊張，加上唔係好慣用口呼吸，所以落到海甩咗吸氧氣個舊野，差d嚇到我反艇，好在教練幫我整返，之後仲好順利咁潛落深d既地方，見到好多魚同珊瑚，仲可以餵佢地。不過之後浮潛d魚好似食到飽曬，完全唔理我地，好無癮。
晚上出咗common上網，同一個岩岩到日本既德國女生傾計。原來佢同我地一樣係讀media既，之前仲去咗3個禮拜韓國，跟住就黎遊日本。然後同一個stay咗係hostel幾日既日本女生傾計，我地問佢係咪黎旅行，佢用google translate話我地知佢係離家出走，仲要話係無理由，總之就咁走咗出黎，由日本最北既北海道黎到最南既沖繩。我地聽完呆咗，唔知點應佢好，因為佢個樣係讀書乖乖女孩樣，仲要帶有框眼鏡。佢好好人咁教咗我地好多生字，一路笑，一路解釋詞語意思。嗚，但我仲係度猜想究竟背後有咩故事。總覺得呢度每一個人都有一個好長好長既故事要講，好想聽。
第七日，去讀谷體驗王國製作手工，目標當然是吹玻璃同織布書簽。哈哈！話説某莊員整爛人地既織布機（其實可能係上手身形太龐大，所以踩到D綫就快斷），不過最終大家都順利完成書簽。不過，一直好想玩既吹玻璃就無得玩，因爲要第二日先拿得。嗚嗚！
帶住遺憾，我地返去Cam Cam拿d野，打算出去食晚飯。點知有個長住Cam Cam的阿姨叫我地
一齊食飯。出到common，見到成台都係野食。仲有其他住客好似輪流獻技甘樣，往台上送上煎蛋同其他餸。大家坐在榻榻米上面一齊食野，好熱鬧好開心。我又繼續用好爛既日文同阿姨們傾計。哈哈！同台有其他年輕住客都用敬語，又不停點頭，好恭敬甘。我仲用簡體，真的大逆不道！
當大家開始吃飽時，一個來自北海道的阿姨突然講一大堆日文，原來是要表演當地的傳統歌舞！她中氣十足，唱得好響亮。歌舞助慶，大家笑得聊得更加開懷！
突然覺得好不捨，爲什麽最後一晚才讓我感受到Cam Cam的熱情？如果有機會，真的想再來沖繩！（不過下次真的自駕遊）
-------------------------------------------
嗯！一點感想：
當初想像沖繩是：藍天白雲，水清沙幼，然後到處也是衝浪陽光男
可是我們來這裡8天，差不多一半的時間也在下雨，超級掃興。
但我想，去旅行，究竟是爲了看見自己想看見的，還是看那個地方真實的模樣？
旅者總是帶住想像與偏見上路，帶住部分的真象回來。
